Derick Brassard

Niikanch miyatuwat, New York Rangers, #16

Derick Brassard Gatineau, Quebec uuh’chiiu kiya September 22, 1987 chii iiyuu. Drummonville Voltigeurs chii matuwamau inta QMJHL kiya 76 tih’tua chii mishiashu a piih’chipitikinuwiich 69 tih’tua a matuwat uushkich ka matuwat Major Juniors. Ittu yapich chii akuatshiiu miin ka puupiniich, ittu mih’chatuwa aa chii mishinashut aa piichipitikinuwiich, mamu 116 tih’tua 58 tih’tua aa chii matuwat, miishkuch wii mauch ka akuatshiit niikanch a matuwach Drumondville. Nimuwii mak uuch mishkataytakushu ka uushkapiinanuwiich a uutinammakinuwiich uushchiniichu 6 a chii utinikut Columbus Blue Jackets 2006 ka uushkapiinanuwiich. Ka iitikut pishch wii mauch a chii nishtuunuwat mishkumi ka itshich ka puupiniich. Niishtim piishum ka matuwat Blue Jackets aa intauch’hach matuwashu, Syracuse Crunch, wii chii wiihakinu mauch ahakuatshiit paykw piishum. Nishwa chii pih’kuh’tau ka puupiniich. Wii kiya chii matuwashtimuwau Crunch AHL All Star ma matuwanuwiich. Brassard, akut uushkich ka wiisamkut Columbus January 2008, wawauch aa chii ushikushik, nim uuch chii matuwau nashch, miin ka niitach’huakinut. Chak miin chii matuwamau 2008-2009 kiya chii tutum ka iish pikushaymakinut ka uut’hik NHL Rookie Of The Month, October 2008. December 18, 2008, Brassard chii ushiku ka mash’hat James Neal, Dallas Stars uu matuwashiimuwau, ka intuwaytakushit cha mach’huakinut. Wawach makuach wii aa chii niikanshit aa piih’chipitimiich uushchiniishu. Ka chip’hiikinuwich aa miishkuchipitshtinakinuwich matuwashuch 2013, Brassard New York Rangers chii ishipitshtinakinu, ashikw atuwii paykwa a chii wiich’hiiwat aa piichipitikinuwiich aa wiiwiiwuap’huutunanuwich. Derick kichah’tawaytima matuwat kiya kichashchippiiyu utih’chii. Nashta inhashuwau aa wuap’himuwat uu wiichawakin. Chishchatakushu kiya aa tshipiihat a wuap’huat.