Stephanie Karlovits

Miyuupimatshiiwiniiu Ka Shuapitchishchaytik

Stephanie akut ka uh’pintauchit pamshkupiiukumch. Wiipich a chatshapayaych chii uush’hiishuu amuya tshkutimashuut kiya ka chiishitshkutimashuut. Kiya iih’ch ih’tawinch chii kuuch’hiitunanuuyu a pamshkupiinanuwiich. 18 tih’tuppun chii pamshkupiiyu Stephanie. Mishtii mak iiyau kih’chah’tawaytimuuniiu a kuatawiinanuwiich, a pamshkupiinanuwiich, a kuashkuut’huutuunanuwiich kiya a pikashuminanuuwiich. Mishtii mak patau chakuwayuu a matuwashuut. Inuch, tipiyuwaushiiu kuatawiiukumkuyuu inta Ottawa. EPIC Fitness iishinkatayuu, kiya wii niikanipshtim MOVE a mamuwiishtikinuwiich miyuupimatshiiwiniiu. Awkw atapitshiit a wiich’hat uuwayuu a uush’hiishuych, a miyuu miitshuuych, Yoga a tuutimiich, aa mamin’huichashiiut, kiya shash 12 tih’tuppun iitapitshiiu. Shaup-itchishchaytim iitakinuu uutapitshiiun. Ayuuk nashta kashchihut a uush’hat matuwashuu, a wiich’hat a minuatshiich, a miyuu-miitshuych kiya. Nashta kiya wiich’hiiwau inta Ottawa, muush pitshtiniishuu cha chii wiich’hiiwat inta Sens Foundation, Ovarian Cancer Foundation, Children’s Breakfast Program, Make A Wish Foundation, Power Of Movement kiya kutik miin. Kuatawiiu kiya wii kiya inchiih’cha chii shakichuwau uuchii Mount Kilimanjaro inta Tanzania Africa. Ayuk wach chii shakichuwat a chii wii wiich’tat Children’s Breakfast Program, kiya $5000 chii uuchipitau. Ayuk nashta pampiihiikut Karlovits a wiich’hat uuwayuu, uushchiniichuu kiya chishaiiyuu, cha chii miyuupimatshiich, kiya cha chii chishchaymiishuych, cha chii chiiyamaytimiich miishkuch cha chii miih’kuatshiich. Ittu mak wii wapimakwa, intu chishchaymakw inta Twitter: @karlovits1