Stephanie Karlovits

Miyuupimatshiiwiniiu ka shuapitchishchaytik

Stephanie, pamshkupiiukumch chii uupinih'tauchuu. Wiipich chiyatshapayaych chii kuachiiu, aa pah'kuwaych chii uush'hiishuu amuya tshkutimashuut, miin mak yapich ka chiish-itshkutimashuuch, kiya chii kuuch'hiiwau wiiwiitima utih'tawinch. Ayuuk ka iishinakuniich uu pimatshiiwin aa pamshkupiit kati nishuash-shuapuppunuashit. Shaupitshchaytum mak aa kuatawiinanuwiich Olympics, aa mah'tau-pamshkupiinanuuch, aa tshchip'hiitunanuuch, aa kuashkuanchiinanuuch kiya aa pikashuminanuuch. Karlovits nashta mishtii chishchaytimuuniiu patau matuwawinch. Inuch, tipiyuwaushiiu aa uush'hiishunanuwiich washkahiikiniiu inta Ottawa. EPIC Fitness ishinkatayuu. Nikanipshtum kiya aa mamuiishtikinuwiich miyuupimatshiiwiniiu MOVE ka iishinkataych. Shash nawsh apitshiishtim miyuupimatshiiwiniiu, aa wiich'hat uuwayuu aa uush'hiishuych, aa miyuumiitshuych kiya Yoga aa tuutimiich. Maamiin'huichau kiya miyupimatshiiwinch. Uushta mak niishuapuppun mishuwa iitapitshiiu, awkw wach iishichimakut aa shuapitshchaytik mishuwa uutapitshiiwin. Ayuk nashta kashchihuut matuwashuu aa wiich'hat, aa minuwatsh'hat kiya, miyuushkuwiiwinch kiya aa wiich'hat matuwashuu aa miih'kuatshiich. Nashta kiya wawiich'hiiwau inta Ottawa. Wii pitshtiniishuu kiya uutapitsh'hakin aa shiitshkuwach Sens Foundation, Ovarian Cancer Foundation, Children's Breakfast Program, Make-A-Wish Foundation kiya Power Of Movement. Yapich kiya kutik. Wii aa uush'hiishut, akuta intah ah'tat washkahiikiniiu ka maamiin'hwik. Inchih'cha kiya chii shakichuwau Kilimanjaro-uuchii inta Tanzania, Africa. Ayuk wah'ch chii shakichuwat aa chii wii wapih'tiiwat aa shiitshkuwat Children's Breakfast Program. $5000 chii pikih'wau shuuyan. Ayuk nashta pamut'hiikut Karlovits aa wii wiich'hat uuwayuu, cha chii chishchaymiishuych wiiyawach, kiya uu mitunaychikinuwach cha chii miyupimatshiich. Ittu wii nantukichashchaymakwa Stephanie, Twitter nantuwapimakw: @karolvits1