Travis Hamonic

Travis Hamonic Metis iitshkanashuu, kiya akut kaa uuh'pintawchit Hamonic Farms in'tah Manitoba. Uutawii chii wiich'hau aa intauchih'taych miichimiyuu. Ka niyayuppunuwashit mak, akut ka mishkuwah'tat hockey. Ka mitah'twuppunwashit mak, chii puunipitatshiiu uuh'tawii Gerald. Paykw-uppun ishipatima, chii ah'tuuchawch aa paykutawshiich in'tah Winnipeg. Akut ka miih'kwatshiit hockey aa matuwat. Ka'hiit wash, awkw ka apitshtat chaka mak'h'wiikut ka win'hat uuh'tawii. Chii iiyim'hawatshiiu uu tuutam, ka matuwamat mak Islanders, awkw wach chii chitshkik nishtw uuch inya nishtupaayikuunach.

Niishtim mak niishw-uppun ka matuwat NHL, Hamonic awkw muk kah'tat Islanders atshiich akaa ittu mih'chatwa uuch piichipitikuniwiich mwashashkupiit iishpsh wii aa piichipitich. Ka chip'hiikinuuch NHL matuwawin 2012-2013, Hamonic Bridgeport chii matuwau, mitah'twa chii piichipitim niishtinuu paykwa aa matuwat. Miin mak ka matuwanuwiich waypishchiish NHL 2012-2013, chii wiich'haw Ilsander aa chii kah'chiich aa wiiwiiwap'shkatunanuwiich Stanley Cup. Chak ka ap'hiishtaych cha chii uutashkunakinuut, miin chii uutashkunikuu Islanders. Niishwashch-tih'tuppun chii mishin'h'wakinuu, niishtinuu-niishwash-shwap million chii tip'himuwakinuu.

Amuya mak uuch chitshtakinuwiich 2017-2018 NHL cha matuwanuwiich, Calgary Flames chii iishimiishkutinakunuu. Chii shichiyahikuu mak Hamonic, wash ittu pashuch uu tuutam ayih'taych chii wii matuwaw.